Èxtra 25-05-’04 • ‘Boss’

Izaline Calister ku un produkshon di aña yama Krioyo



WILLEMSTAD- Tabata manera tur hóben ku finalisá nan estudio sekundario aki na Kòrsou ku kier sigui studia, e tambe a opta pa bai Hulanda despues di a finalisá Radulphus College. Boss ta referí aki ta e gran kantante i artista di Jazz Izaline Calister.

Yegando Hulanda Izaline a pone tur ku tin tras di su estudio pa a finalisa na Universidat di Groningen komo drs. den Business Administration. Esatando na Groningen Izaline a bin sinti ku e kier ta den kanto manera semper ela hasi for di chikitu aki na Kòrsou kantando ku Perlitas di konosido suidadano Rudy Plaate. E kantamentu a keda semper e loke ku mas Izaline tabata kier i el a disidí bai konservatorio i kombiná ku esaki a kuminsá kanta ku diferente grupo musikal. Izaline a bira hopi popular i kerí aki na su Isla natal. Izaline a produsí un kantidat di dos disko kompakto i aña pasa Izaline a risibí un invitashon pa saka su di tres disko kompakto serka Network Medien, e label Aleman renombrá pa loke ta “wereldmuziek”. Despues di su mes produkshonnan ku ta “Soño di un muhé na aña 2000 i Mariposa na 2002” Izaline a sigui haña mas inspirashon di e muzik krioyo di su pais esat Tambú, Tumba, Ritmo Kombiná, Muzik di Zumbi i Ritmo di seú. Un biaha mas Izaline ta hasi uso di papiamentu, su lenga materno, pa ekspresá sumes na un nivel musikal hopi haltu. Luna pasa Izaline a presentá e disko kompakto nobo pa promé biaha na públiko hulandes na den Haag, nan a aspet’é di un forma eksitoso i abrumador.

E diferente interpretashonnan di e palabra – Krioyo- manera por ehèmpel: e sentimentu di ta na kas pero tambe e kushina típiko di nos ku su diferente platonan sukulento ta karakterisá e sentimentu ku a inspirá Izaline pa despues di 2 aña por a presentá su di 3 disko kompakto.E disko kompakto di Izaline ta konsistí di 12 tanki di komposishon ku ta masha masha bon mes. Por bisa hasta mas ku bon. Aktualmente e komposishon Wow’i kariño ta fuertemente pega na tur radio mesora i vários ta e agrupashonnan musikal popular ku ya ta hinkando e piesa aki den nan reportorio. Izaline Calister a lansa un bòm mes mes ku e grabashon aki i por bisa for di awor ku e disko kompakto aki ta pintando di bira e disko kompakto di aña. Ta masha bon mes pa nos agrupashonnan musikal tuma e ehèmpel riba e disko kompakto aki di Izaline, kon mester trese un disko kompakto dilanti sigur pa loke ta trata kontenido i musikalisashon. Nos kier felisitá Izaline ku e produkshon aki i tambe su agrupashon musikal ku ta konsisti di Eric Calmes, Randal Corsen Roël Calister, Pernell Saturnino, Ulrich de Jesus i Niata Augusta. E disko kompakto aki tan a benta na tur bon disko bar i kere Boss ku e ta bai masha duru mes. Buska bo Krioyo pa bo sinti kiko i kon ta toka i kanta bon i dushi.